کراچی : ملک میں میڈیکل اور ڈینٹل کالجوں میں داخلے کے خواہشمند ہزاروں طلبہ کے لیے ایم ڈی کیٹ ٹیسٹ کی تیاری صرف ذہنی ہی نہیں بلکہ مالی دباؤ کا باعث بھی بن گئی ہے۔ پاکستان میڈیکل اینڈ ڈینٹل کونسل (پی ایم ڈی سی) نے رواں سال فیس میں مزید اضافہ کرتے ہوئے اسے 9 ہزار روپے کر دیا ہے، جو دو برس میں 80 فیصد کا اضافہ ہے۔
اعدادوشمار کے مطابق، 2023 میں یہ فیس 5 ہزار روپے تھی، جو 2024 میں 7 ہزار اور اب 2025 میں 9 ہزار روپے ہو گئی۔ گزشتہ سال 32 ہزار 977 امیدواروں نے ٹیسٹ میں شرکت کی تھی، اور اسی تناسب سے رواں سال پی ایم ڈی سی کو رجسٹریشن فیس کی مد میں تقریباً 3 ارب روپے کے قریب آمدن متوقع ہے۔
امتحان 5 اکتوبر 2025 کو ملک بھر اور سعودی عرب میں ایک ساتھ منعقد ہوگا۔ اس کے لیے پنجاب میں یونیورسٹی آف ہیلتھ سائنسز لاہور، سندھ میں سکھر آئی بی اے یونیورسٹی، خیبرپختونخوا میں خیبر میڈیکل یونیورسٹی پشاور، بلوچستان میں بولان میڈیکل یونیورسٹی کوئٹہ، جبکہ وفاقی دارالحکومت، گلگت بلتستان، آزاد کشمیر اور ریاض میں مقیم پاکستانی طلبہ کے لیے شہید ذوالفقار علی بھٹو میڈیکل یونیورسٹی اسلام آباد کو امتحان کا منتظم مقرر کیا گیا ہے۔
رجسٹریشن اور فیس تفصیل کے مطابق عام رجسٹریشن: 8 تا 25 اگست 2025 ، لیٹ فیس کے ساتھ: یکم ستمبر 2025 تک، پاکستان میں فیس: 9 ہزار روپے (لیٹ فیس کے ساتھ 13 ہزار روپے) جبکہ ریاض میں فیس: 45 ہزار روپے (لیٹ فیس کے ساتھ 55 ہزار روپے) ہوگی۔
پی ایم ڈی سی کے مطابق، فیس ناقابل واپسی اور ناقابل منتقلی ہوگی، جبکہ امیدواروں کو صرف اپنے ڈومیسائل کے مطابق امتحانی مرکز منتخب کرنے کی اجازت ہوگی۔
ایم ڈی کیٹ انگریزی زبان میں لیا جائے گا، پرچہ 180 ملٹی پل چوائس سوالات پر مشتمل ہوگا، جن میں حیاتیات، کیمیا، طبیعیات، انگریزی اور منطقی سوچ شامل ہیں۔ سوالات میں 15 فیصد آسان، 70 فیصد درمیانے اور 15 فیصد مشکل سطح کے ہوں گے، اور کسی بھی سوال میں منفی مارکنگ نہیں کی جائے گی۔
