خیرپور : سندھ کے بڑے اور پرانے سرکاری اسپتالوں میں شامل سول اسپتال خیرپور میں افسوسناک واقعہ اُس وقت پیش آیا جب اسپتال کے میڈیکل وارڈ نمبر 2 کی چھت کا بڑا حصہ اچانک گر پڑا، جس کے نتیجے میں تین مریض شدید زخمی ہو گئے۔ واقعے نے نہ صرف اسپتال کی بوسیدہ حالت کو عیاں کر دیا بلکہ سندھ حکومت کے صحت نظام کی ناکامی کو بھی بے نقاب کر دیا۔
واقعے کے وقت وارڈ میں کئی مریض داخل تھے۔ چھت کے چاپڑ اور ملبہ گرنے سے زخمی ہونے والے مریضوں کو کئی چوٹیں آئی ہیں۔ واقعے کے بعد مریضوں کے اہل خانہ نے شدید احتجاج کیا اور اسپتال انتظامیہ کو ذمہ دار قرار دیا۔
ذرائع کے مطابق چھت کی حالت انتہائی خستہ تھی لیکن کوئی مرمتی کام نہیں کرایا گیا۔ سندھ کی صحت سہولیات پر بھاری بجٹ کے باوجود اسپتالوں کی یہ حالت لمحہ فکریہ ہے۔
چھت کا پلستر گرنے کی ویڈیو سوشل میڈیا پر بھئ وائرل ہے جس پر سندھی میں لکھا جملہ اس واقعے پر عام عوام کے جذبات کی بھرپور عکاسی کرتا ہے۔ “هي آهي اسان جي سنڌ جي خدمت جو حال!”۔ یہ جملہ اس نااہلی اور عدم توجہ پر ایک تلخ اور عوامی طنز ہے۔
