کراچی : کالج آف فیملی میڈیسن پاکستان (CFMP) نے تولیدی اور جنسی صحت کے حوالے سے پاکستان کی تاریخ کا پہلا ہائبرڈ سرٹیفکیٹ کورس شاندار افتتاحی تقریب کے ساتھ لانچ کر دیا۔ یہ چھ ماہ دورانیے کا کورس کراچی کے ایک مقامی ہوٹل میں تعلیمی و طبی شخصیات کی موجودگی میں متعارف کرایا گیا۔
یہ جدید کورس پاکستان کی پانچ بڑی طبی تنظیموں پاکستان اینڈوکرائن سوسائٹی (PES)، پاکستان سوسائٹی آف انٹرنل میڈیسن (PSIM)، ڈایابیٹک ایسوسی ایشن آف پاکستان (DAP)، سوسائٹی آف گائناکالوجسٹس اینڈ آبسٹیٹریشن آف پاکستان (SOGP)، اور پرائمری کیئر ڈایابیٹس ایسوسی ایشن (PCDA) کے اشتراک سے تیار کیا گیا ہے۔
کورس کا بنیادی مقصد پرائمری کیئر فزیشنز اور پوسٹ گریجویٹ ڈاکٹروں کو تولیدی و جنسی صحت جیسے نازک مگر عام مسائل کے حوالے سے جدید، سائنسی اور عملی علم سے آراستہ کرنا ہے۔ کورس کے ڈائریکٹر پروفیسر ڈاکٹر محمد زمان شیخ، پاکستان کے ممتاز اینڈوکرائنولوجسٹ ہیں، جبکہ ڈاکٹر شہلا نسیم اس پروگرام کی کو-ڈائریکٹر اور کالج آف فیملی میڈیسن کی جنرل سیکریٹری ہیں۔
افتتاحی تقریب کے مہمانِ خصوصی معروف معالج و ماہر تعلیم پروفیسر جاوید اکرم (صدر PSIM و سابق وزیر صحت پنجاب) تھے جبکہ دیگر ممتاز ماہرین جیسے پروفیسر عائشہ شیخ، پروفیسر علی اصغر، پروفیسر سعید مہر، پروفیسر عبدالباسط، پروفیسر شبین ناز مسعود، ڈاکٹر ریاست علی خان، اور ڈاکٹر اسماء خان نے بھی شرکت کی۔
اس موقع پر عالمی شہرت یافتہ ماہرین انٹرنیشنل ڈایابیٹیز فیڈریشن کے صدر پروفیسر پیٹر شوارٹز اور تولیدی صحت کے عالمی ماہر پروفیسر دیپک جمانی نے آن لائن خطاب کے ذریعے اس تعلیمی پیش رفت کی اہمیت پر روشنی ڈالی۔ کورس کے دوران مندرجہ ذیل اہم موضوعات پر تفصیلی سائنسی تربیت دی جائے گی جن میں مرد و خواتین میں بانجھ پن، حیض کی بے قاعدگیاں، خواتین میں غیر ضروری بالوں کی زیادتی (Hirsutism)، جنسی طور پر منتقل ہونے والی بیماریاں، ہارمونی، غدودی و جنسی عوارض، پولی سسٹک اوورین سینڈروم شامل ہیں۔
