کراچی : ڈائریکٹر ہیلتھ سروسز کراچی ڈاکٹر عبدالحمید جمانی کی آشیرباد اور ڈی ایچ او سینٹرل ڈاکٹر شاہ محمد شیخ کی مہربانی سے عدالتی احکامات کے خلاف ڈینٹل سرجن ڈاکٹر حرا ظہیر کو ایک بار پھر ضلع وسطی میں کورونا وائرس کا فوکل پرسن تعینات کر دیا ہے۔ جس سے ڈاکٹر عبدالحمید جمانی کے دعوے جھوٹے ثابت ہوگئے ہیں۔
یاد رہے کہ ہیلتھ ٹائمز کی خبروں پر ایکشن لیتے ہوئے ڈائریکٹر ہیلتھ سروسز کراچی نے 2 جنوری 2023 کو ڈاکٹر حرا ظہیر سے فوکل پرسن ، ڈرگ لائسنس، اینٹی کوئیکری کے تمام چارج واپس لے کر انہیں ڈینٹل کلینک سندھ گورنمنٹ ڈسپنسری غریب آباد میں ان کی اصل جگہ تعینات کر دیا تھا اور ڈی ایچ او آفس میں ان کے دفتر کو تالا لگا کر انہیں ڈینٹل کلینک میں دانتوں کے امراض میں مبتلا غریب مریضوں کی خدمت کرنے کا پاپند کیا تھا۔ ڈاکٹر عبدالحمید جمانی ان کی حاضری چیک کرنے کے ساتھ مریضوں کے معائنے کی رپورٹ بھی چیک کرتے تھے لیکن چند دن قبل ایک پروگرام میں ملاقات کے بعد یہ سختی ختم کر دی گئی بلکہ آشیرباد حاصل ہوگئی۔
ڈائریکٹر ہیلتھ سروسز نے نمائندہ ہیلتھ ٹائمز کو بتایا تھا کہ وہ ڈاکٹر حرا ظہیر کی حاضری بھی چیک کرتے ہیں لیکن اگر اس کے باوجود وہ مریضوں کی خدمت کے بجائے ڈی ایچ او سینٹرل آفس میں آرہی ہیں تو وہ ان کے خلاف کاروائی کریں گے اور ڈی ایچ او سینٹرل سے وضاحت طلب کریں گے لیکن اب آشیرباد حاصل ہونے کے بعد ڈی ایچ او سینٹرل نے بھی ڈاکٹر حرا ظہیر پر دوبارہ مہربانیاں شروع کر دیں۔
ڈاکٹر شاہ محمد شیخ نے ڈاکٹر حرا ظہیر کی ڈینٹل کلینک سندھ گورنمنٹ ڈسپنسری غریب آباد سے واپس ڈی ایچ او آفس میں پوسٹنگ کر دی ہے اور یہ تمام آڈر ڈی ایچ او سینٹرل نے چھپا کر اپنے پاس رکھے ہیں تاکہ اندرون خانہ کام بھی ہوتا رہے، محکمہ صحت کو خبر بھی نہ ہو اور عدالتی احکامات کی خلاف ورزی بھی سامنے نہ آسکے حالانکہ ایک اسپیشل کیڈر کے ڈاکٹر کو انتظامی عہدے پر تعینات کرنا عدالتی احکامات کی صریح خلاف ورزی ہے۔
ڈاکٹر شاہ محمد شیخ نے ڈاکٹر حرا ظہیر کے زیر استعمال جس کمرے کو تالے لگائے تھے وہ دوبارہ ان کے سپرد کر دیا ہے جس سے جنرل کیڈر کے درجنوں اہل ڈاکٹروں میں بے چینی پائی جاتی ہے۔ جنرل کیڈر کے ڈاکٹروں نے اس حق تلفی پر چیف جسٹس سندھ ہائی کورٹ، صوبائی وزیر صحت اور صوبائی سیکریٹری صحت سے اس معاملے کا نوٹس لینے کا مطالبہ کیا ہے۔
