جینیوا : وفاقی وزیر صحت مصطفی کمال نے فلسطینی وزیر صحت سے ملاقات کی۔ یہ ملاقات عالمی ادارہ صحت کی اسمبلی کے موقع پر ہوئی، جہاں مصطفی کمال نے وزیراعظم شہباز شریف کا پیغام فلسطینی ہم منصب کو پہنچایا اور پاکستان کے فلسطینی کاز سے غیر متزلزل عزم کا اعادہ کیا۔
فلسطینی وزیر نے پاکستان کی تاریخی حمایت کو سراہا۔ ملاقات میں غزہ کے لیے طبی و انسانی امداد پر تبادلہ خیال ہوا، دونوں وزراء نے انسانی ہمدردی کے عملی اقدامات پر گفتگو کی۔
مصطفی کمال نے کہا کہ فلسطین کو طبی اور انسانی امداد فراہم کرنے کے مختلف طریقوں پر تبادلہ خیال کیا ہے اور ورلڈ ہیلتھ اسمبلی کے اجلاس میں عالمی دنیا کی توجہ اسرائیل کی غزہ میں جاری جارحیت پر مبذول کروائی ہے، پاکستان فلسطین، خصوصاً غزہ کے خلاف اسرائیلی جارحیت کی شدید ترین الفاظ میں مذمت کرتا ہے۔
مصطفی کمال نے مذید کہا کہ اسرائیل کا اسپتالوں اور طبی عملے کو جان بوجھ کر نشانہ بنانا انتہائی افسوس ناک عمل ہے، یہ نسل کشی پر مبنی مہم اور مظالم فوری طور پر بند ہونے چاہیں۔
