کراچی: ڈاؤ یونیورسٹی آف ہیلتھ سائنسز کے زیر اہتمام دونوں کیمپسز میں بھارتی جارحیت کے خلاف اور افواج پاکستان سے اظہار یکجہتی کے لیے ریلیاں نکالی گئیں اور احتجاجی مظاہرے کیے گیے، اوجھا کیمپس میں سینکڑوں طلباء و طالبات، اساتذہ اور غیر تدریسی عملے پر مشتمل ریلی کی قیادت وائس چانسلر پروفیسر ڈاکٹر جہاں آرا حسن نے کی جبکہ ڈاؤ میڈیکل کالج میں نکلنے والی ریلی کی قیادت پرو وائس چانسلر پروفیسر نازلی حسین نے کی
اوجھا کیمپس میں ڈاؤ انٹرنیشنل میڈیکل کالج سمیت دیگر طلبہ و طالبات نے ہاتھوں میں پلے کارڈ اٹھا رکھے تھے جن پر بھارت کی بزدلانہ کارروائیوں کے خلاف نعرے درج تھے، ریلی کے دوران شرکاء کی جانب سے پاکستان کا مطلب کیا، لا الا الا اللہ، پاک فوج زندہ باد اور پاکستان زندہ باد کے فلک شگاف نعروں سے فضاء گونج اٹھی۔
اس موقع پر طلباء و طالبات کو پیغام دیتے ہوئے وائس چانسلر پروفیسر ڈاکٹر جہاں آرا حسن کی جانب سے کہا گیا کہ بھارت اپنی بزدلانہ کارروائیوں کے ذریعے اپنے ناپاک جنگی عزائم میں کبھی کامیاب نہیں ہو سکتا، ان کی جانب سے کہا گیا کہ کسی بھی ہنگامی صورتحال میں پاکستان کا ایک ایک شہری افواج پاکستان کے ساتھ بطور ہر اول دستہ اپنا بھرپور کردار ادا کرے گا انہوں نے طلبا وطالبات پر زور دیا کہ اتحادو یکجہتی برقرار رکھیں ملک وقوم کو اتحاد و اتفاق کی ضرورت ہے
ڈاؤ میڈیکل کالج کیمپس میں جامعہ کے اساتذہ و طلبہ کی جانب سے بھارتی بزدلانہ کارروائیوں کے خلاف احتجاج کیا گیا طلبہ کی جانب سے ‘پاک فوج قدم بڑھائو ہم تمہارے ساتھ ہیں’ کے نعرے اور بینرز بھی اٹھا رکھے تھے
شرکاء نے جامعہ کی جانب سے قوم اور افواج پاکستان سے مکمل یکجہتی کا اظہار کیا اساتذہ کا کہناتھا کہ حالیہ بھارتی بلااشتعال جارحیت اور بزدلانہ کارروائیوں کی سخت الفاظ میں مذمت کرتے ہوئے اسے بین الاقوامی قوانین کی خلاف ورزی اور معصوم شہریوں پر سفاکانہ حملہ قرار دیا ہے اساتذہ نے کہا کہ، “بھارت کی یہ بزدلانہ کارروائیاں ہماری قومی عزم کو کمزور نہیں کر سکتی
انہوں نے پاکستانی عوام اور افواجِ پاکستان کے ساتھ غیرمتزلزل یکجہتی کا اظہار کرتے ہوئے کہاکہ“ہم اپنی بہادر افواج اور پوری قوم کے ساتھ شانہ بشانہ کھڑے ہیں۔ یہ فیصلہ کن وقت ہے، ہم ایک قوم بن کر متحد ہیں۔ ہمیں خوفزدہ نہیں کیا جا سکتا۔ ہم اپنی خودمختاری کا مکمل عزم کے ساتھ دفاع کریں گے”
اساتذہ نے واضح کیا کہ ڈاؤ یونیورسٹی قومی وقار کے جذبے کے ساتھ مکمل ہم آہنگ ہے “یہ اتحاد اور عزم کا وقت ہے۔ ہم اپنے سپاہیوں، اپنے عوام اور اپنے وطن کے ساتھ ہیں”بھارتی بزدلانہ جارحیت کے سامنے، پاکستان مضبوطی سے کھڑا ہے۔ دنیا کو بتارہے ہیں ہم پرامن ہیں، لیکن اپنے قومی وقار کا بھرپور دفاع کرنے کا حق رکھتے ہیں۔
