کراچی: ڈاؤ یونیورسٹی آف ہیلتھ سائنسز کی قائم مقام وائس چانسلر پروفیسر ڈاکٹر جہاں آرا حسن کو ان کی تدریسی، تحقیقی اور انتظامی خدمات کے اعتراف میں لائف ٹائم اچیومنٹ ایوارڈ سے نوازا گیا ہے۔ یہ اعزاز ڈاؤ گریجویٹس ایسوسی ایشن آف نارتھ امریکہ (ڈوگانا) کی جانب سے امریکی ریاست ٹیکساس کے شہر ڈیلاس میں ایسوسی ایشن کے سالانہ سمر اجلاس کے دوران دیا گیا۔
ڈاؤ یونیورسٹی کی انتظامیہ نے پروفیسر جہاں آرا حسن کو ایوارڈ ملنے پر دلی مبارکباد پیش کی ہے اور ان کی خدمات کو ادارے کے لیے باعثِ فخر قرار دیا ہے۔
پروفیسر جہاں آرا حسن ڈاؤ میڈیکل کالج کی 1989ء کی گریجویٹ ہیں اور ڈاؤ یونیورسٹی کی پہلی پی ایچ ڈی ڈاکٹر ہونے کا اعزاز بھی رکھتی ہیں۔ انہوں نے 2012 میں گائناکالوجی کے شعبے میں ڈاکٹریٹ مکمل کی اور بعدازاں ہائر ایجوکیشن کمیشن کی منظور شدہ پہلی پی ایچ ڈی سپروائزر بھی بنیں۔ ان کے 50 سے زائد تحقیقی مقالہ جات بین الاقوامی سائنسی جرائد میں شائع ہو چکے ہیں۔
کووڈ-19 کے دوران انہوں نے بطور میڈیکل سپرنٹنڈنٹ اور آئی سی یو ڈائریکٹر مؤثر قیادت فراہم کی۔ ان ہی کی قیادت میں ڈاؤ اسپتال کو سندھ ہیلتھ کیئر کمیشن سے کامیابی سے منظوری حاصل ہوئی۔ ان کے دور میں ڈاؤ یونیورسٹی کو چھ نئے سیکنڈ فیلوشپ پروگرامز کی منظوری ملی، جبکہ فی الوقت 35 سے زائد فرسٹ فیلوشپ پروگرامز بھی جاری ہیں۔
بطور پرو وائس چانسلر اور اوجھا کیمپس ڈائریکٹر، انہوں نے جامعہ میں نظم و ضبط، شفافیت اور تعلیمی معیار کو فروغ دیا۔ ایوارڈ ملنے پر اظہارِ خیال کرتے ہوئے انہوں نے کہا کہ یہ لمحہ ان کے لیے محض اعزاز نہیں بلکہ ایک جذباتی لمحہ بھی ہے۔ انہوں نے یہ اعزاز اپنی فیملی، اساتذہ، ساتھیوں، طلبہ اور مریضوں کے نام منسوب کیا۔
