یونیورسٹی آف ہیلتھ سائنسز کے سالانہ سپورٹس ویک کا آغاز ہوگیا۔ پرو وائس چانسلر پروفیسر معروف عزیز خان نے ایک رنگا رنگ تقریب میں گیمز کا باقاعدہ افتتاح کیا۔ اس موقع پر مختلف گیمز میں حصہ لینے والے طلبہ نے مارچ پاسٹ کیا اور حلف اٹھایا۔
اپنے خطاب میں پرو وائس چانسلر یو ایچ ایس نے کہا کہ میڈیسن کی پڑھائی سخت ہونے کی وجہ سے طلبہ سپورٹس اور دیگر غیر نصابی سرگرمیوں میں کم حصہ لیتے ہیں تاہم شخصیت کی تکمیل کیلئے ہر انسان میں سپورٹس مین سپرٹ کا ہونا ضروری ہے۔ سپورٹس کے نتیجے میں طلبہ کے اندر صحت مند مسابقت کا جذبہ جنم لیتا ہے جو زندگی کے دیگر شعبوں میں بھی ان کیلئے کامیابی کے دروازے کھولتا ہے۔
یو ایچ ایس کے ڈائریکٹر سپورٹس ڈاکٹر شاہ جہاں نے کہا کہ پہلی مرتبہ انڈر گریجویٹ طلبہ ان گیمز میں حصہ لے رہے ہیں۔انھوں نے مزید کہا کہ یو ایچ ایس کے طلبہ پر مشتمل ٹیم انٹر یونیورسٹی سپورٹس میں بھی حصہ لے گی۔ سپورٹس ویک کے پہلے روز جن انڈور گیمز کے مقابلے ہوئے ان میں کیرم بورڈ، شطرنج، لڈو، ڈارٹ اور سکریبل شامل تھے۔
اس کے علاوہ یو ایچ ایس کے سٹاف ممبرز کے درمیان کرکٹ میچ کا بھی انعقاد کیا گیا۔ سپورٹس اینڈ کلچرل ویک یکم اپریل تک منایا جائے گا۔ اس دوران فٹ بال، بڈمینٹن، کرکٹ، دوڑ، جوڈو کراٹے، رسہ کشی اور کوکنگ کے مقابلے بھی ہوں گے۔
