میرپورخاص : میڈیکل طالبہ فہمیدہ لغاری کی مبینہ خودکشی کے معاملے نے قانونی رخ اختیار کر لیا ہے، پولیس نے متوفیہ کے ماموں کی مدعیت میں مقدمہ درج کرتے ہوئے تعلیمی ادارے کے اہم عہدیداروں اور طلبہ کو نامزد کر دیا ہے۔
پولیس کے مطابق درج کی گئی ایف آئی آر میں میڈیکل کالج کے پرنسپل، ایک پروفیسر کی اہلیہ، ایک لیکچرر اور دو طالب علموں کو شامل کیا گیا ہے۔ مقدمے میں جنسی ہراسانی اور طالبہ کو خودکشی پر مجبور کرنے کی سنگین دفعات عائد کی گئی ہیں، جس کے بعد کیس مزید حساس نوعیت اختیار کر گیا ہے۔
یاد رہے کہ گزشتہ روز میرپورخاص کے علاقے سیٹلائٹ ٹاؤن میں 21 سالہ میڈیکل طالبہ نے مبینہ طور پر خود کو گولی مار کر زندگی کا خاتمہ کر لیا تھا، جس کے بعد اہلخانہ نے ہراسانی کے الزامات عائد کرتے ہوئے انصاف کا مطالبہ کیا تھا۔
پولیس حکام کا کہنا ہے کہ واقعے کی تحقیقات مختلف پہلوؤں سے جاری ہیں اور نامزد افراد کے خلاف قانون کے مطابق کارروائی عمل میں لائی جائے گی۔ ذرائع کے مطابق شواہد اکٹھے کرنے اور بیانات قلمبند کرنے کا عمل بھی تیز کر دیا گیا ہے تاکہ کیس کو منطقی انجام تک پہنچایا جا سکے۔
یہ پیش رفت اس کیس میں ایک اہم موڑ سمجھی جا رہی ہے، جہاں اب الزامات باقاعدہ قانونی دائرے میں داخل ہو چکے ہیں اور آئندہ دنوں میں گرفتاریوں اور انکشافات کا امکان ظاہر کیا جا رہا ہے۔
